Awtoritar hökümdar Aleksandr Lukaşenka Belarusda "onlarça rus ýadro ýaragynyň" ýerleşdirilendigini aýdyp, Günbatarda Moskwanyň Ukraina garşy alyp barýan urşunyň ýaýramak ähtimallygy baradaky aladany güýçlendirdi.
Russiýanyň prezidenti Wladimir Putiniň esasy ýarany bolan Lukaşenka Minskdäki Bütin Belarus halk mejlisinde eden çykyşynda ýygnagyň rus ýadro ýaraglarynyň ýurtda ýerleşdirilmegini göz öňünde tutýan täze harby doktrinany biragyzdan kabul edendigini aýtdy.
25-nji aprelde YouTube kanalynda, göni efirde görkezilen ýygnakda aýdylmagyna görä, rus ýadro ýaraglarynyň Belarus topraklarynda ýerleşdirilmegine strategiki öňüni alyş çäresi hökmünde garalýar.
Moskwa 2022-nji ýylyň fewral aýynda Ukraina garşy giň gerimli çozuşa başlaly bäri, Belarus Russiýa maddy-tehniki goldaw berdi. Şondan bäri Moskwa taktiki ýadro ýaraglaryny Belarusa geçirdi, bu, Sowet Soýuzy dargaly bäri, ýadro ýaraglarynyň Russiýanyň daşynda ilkinji gezek ýerleşdirilmegi boldy.
NATO bu çäräni "howply we jogapkärçiliksiz" diýip atlandyrdy.
Lukaşenka 1991-nji ýylda, Sowet Soýuzy darganyndan soň, ähli strategiki ýadro ýaraglarynyň Belarusdan çykarylmagynyň “ýalňyşlyk bolandygyny” we Russiýanyň taktiki ýadro ýaraglarynyň Belarusda galmalydygyny aýtdy.
Emma muňa garamazdan, ol Belarusyň garaşsyzlygynyň "her nähili ýagdaý bolsa-da" saklanmalydygyny aýtdy.
Lukaşenka köplenç öz goşunyny hemişe hüşgär ýagdaýda saklamagyň gürrüňini edip, munuň sebäbini NATO ýa-da Ukraina tarapyndan hüjüm edilmek howpy bilen baglanyşdyrýar.
Ol öz çykyşynda oppozisiýa toparlarynyň Belarusyň günbataryndaky bir sebiti ele geçirip, NATO goşunlaryndan goldaw soramakçy bolýandygyny hem öňe sürdi.
Belarusyň howpsuzlyk gullugy 25-nji aprelde Litwadan uçurylan pilotsyz uçarlar bilen Minskä edilen hüjümiň öňüni alandygyny aýtdy. Wilniusdaky resmiler bu aýyplamany bada-bat ret etdiler.
Lukaşenka Günbatary, "deňe-deň diýip atlandyrmak arkaly, Russiýa bilen gapma-garşylygy bes etmäge" çagyrdy we munuň parahatçylyk prosesine, Ukrainadaky konflikti soňlamaga getirjekdigini öňe sürdi.
"Şeýle edilmese, Ukraina barlygyny togtadýar" diýip, ol sözüniň üstüni ýetirdi.
Bütin Belarus halk mejlisi hökümetiň pudak ýolbaşçylary bilen geçirýän umumy ýygnagy bolup, bu ýygnanyşyk mundan öň, 1996-njy ýyldan 2021-nji ýyla çenli alty gezek geçirildi.
Oppozisiýa syýasatçylary we aktiwistler bu mejlisi tankytlap, ony ýurdy 1994-nji ýyldan bäri berk gözegçilikde dolandyran awtoritar lidere biragyzdan goldaw bildirilýändigini görkezmek, Lukaşenkany wagyz etmek üçin ulanylýan gural diýip atlandyrdylar.
Forum