Gürjüstanyň prokurorlary ýurduň öňki prezidenti Mihail Saakaşwilä garşy jenaýat aýyplamalaryny ýöňkelýär.
Gürjüstanyň Baş prokuraturasynyň 28-nji iýulda beren maglumatyna görä, Saakaşwiliniň wezipesinden hyýanatçylykly peýdalanandygy baradaky aýyplamalar 2007-nji ýylyň noýabr aýynda Tbiliside bolan hökümete garşy protestleri basyp ýatyrmak, şeýlede, “Imedi” telewideniýe merkezine garşy gurnalan reýd we onuň “ele geçirilmegi” bilen bagly.
Şuňa meňzeş aýyplamalar 2007-nji ýylda Gürjüstanda ýokary derejeli wezipeleri eýelän Saakaşwiliniň birnäçe ýaranyna garşy hem ýöňkeldi.
Bu baradaky beýanat 28-nji iýulda Saakaşwili Gürjüstanyň Baş prokuratura edarasyna soraga gelmänden soň yglan edildi.
Saakaşwili özüniň ikinji prezidentlik möhleti tamamlanandan soň, geçen ýylyň ahyrynda Gürjüstany terk edipdi. Gürjüstanyň öňki prezidenti 28-nji iýulda öz Facebook sahypasynda “Gürjüstana haçan barjagyny özüniň çözýändigini” ýazdy.